நிகழ்வே இன்பம்

நேற்றை நினைவின் சுவடே இல்லை

நாளைக் கனவென எதுவும் இல்லை

இன்றே இதுவே இப்பொழு தொன்றே

நன்றாய் நலமாய் சுகமாய் சுவையாய்

எண்ணும் மனதில் சுமைகள் இல்லை

கண்ணில் கவலை வரிகள் இல்லை

நிகழ்வே நிஜமென்றரியும் நெஞ்சில்

இகமோ பரமோ பிரிவோ இல்லை

குழந்தைமை

இதமான மாலை ஒன்றில் தனியாக நடந்திருந்தேன்
விதமான எண்ணக் கூட்டம் ஒன்றொன்றாய் கலைந்த போதில்
புரியாத காரணத்தால் புன்னகை முகிழ்த்து நின்றேன்
அறியாத குழந்தை நாளை எளிதாகச் சென்றடைந்தேன்

யோகம் - 1

உடலின் உணர்வை முழுதும் மறந்து உள்ளில் உறைந்த போது
கடலாய் விரிந்த கவலை, கனவு , அறிவைத் தொலைத்த போது
மடலை விரித்து மகரம் தெளிக்கும் மலர்கள் கூட்டம் தெரியும்
ஜடமாய்க் கிடந்து அறியும் நேரம் மனதின் உருவம் புரியும்

என் இறைவன்

என் முதல் உணர்வில் எனக்குள் இறைவன்
என் முதல் மூச்சில் முழுதாய் உணர்ந்தேன்
என் மனக் கண்ணீர் திருவடிப் பூக்கள்
என் குரல் சுருதி இறை அருள் நாதம்

ஹரி அருள் என்றும் என்னுள் ததும்பும்
ஹரன் அருள் கிரணம் எந்தன் இல்லம்
அம்பிகை அருள் என் நினைவில் தஞ்சம்
துதிக்கைத் தூரிகைத் துயரைத் துடைக்கும்

கண்ணன் கடைக் கண் வீரக் கவசமும்
கருணைத திரு மகள் காவல் வலைக்குள்
உறையும் எனக்குக் கவலைகள் இல்லை
பொருளோ புகழோ இனிப் பொருட்டில்லை